اسلام آباد۔19اکتوبر (اے پی پی)وزیراعظم عمران خان آکھیاجو کورونا بارے عالمی ادارہ صحت(ڈبلیو ایچ او) منیے جو پاکستان انہاںچار ملکاںاچوں اے جنہاںکورونا نال نبڑنڑ سانگے چنگے فیصلے کیتن۔اسلام آباد اچ کلین گرین انڈیکس انکر یجمنٹ ایوارڈ دی تقریب نال خطاب کریندیں ہوئیں آکھیا جو کورونا بارے فیصلیاں کوں پوری دنیا منیے۔انہاں آکھیا جو حکومت دے کیتے گئے فیصلیاں نال معاشی تباہی توں بچ گئیوں جڈانجو بھارت اچ کورونا بارے غلط فیصلیاں پاروں بدترین معاشی اتے انسانی بحران آئے ۔تقریب نال خطاب کریندیں ہوئیں انہاں آکھیا جو نینگراں اچ رضاکارانہ خدمات دا بہوں جذبہ اے اتے ایندا اندازہ انہاں کوں اوں ویلھے تھیاجڈاں میں شوکت خانم سانگے عوام اچ نکلیاں ہم۔انہاں آکھیا جو میں کنوں ودھ کوئی نی جانڑسگدا جو پاکستان دی عوام اچ خیرات ڈیونڑدا کتنا جذبہ اے۔انہاں آکھیا جو پوری دنیا اچ صفائی دا نظام اے پر پاکستان اچ ایجھی مثال نی ملدی کیونجو اساں اپنڑے اداریاں کوں تباہ تھیندے ڈٹھے۔لاہور اچ ترقی دے ناں تے ستر فیصد ونڑ ختم کر ڈتے گئے اتے کراچی شہر دا سارا گند سمندر اچ سٹیا ویندا پئے ،ہر سڑک تے کچرا اے۔انہاں آکھیا جو ہنڑ ویلھا اے جو انتظامیہ اتے عوام رل تے ونڑ لاون تے توجہ ڈیون اتے آونڑ آلی نسلاں کوں چنگا ماحول ڈیون۔انہاں آکھیا جو اللہ دی نعمتاں دی قدر نہ کر تے اساںماحولیاتی تباہی دے دھانے پج گیوں۔انہاں آکھیا جو لاہور، کراچی، فیصل آباد، پشاور سودھے بئے شہراں اچ آلودگی ودھ اے اتے سردیاں اچ پہلے توں بئے وائرس دا حملہ تھی سگدے اتے کورونا وبا ءکھنڈ سگدی اے۔انہاں آکھیا جو ڈاہ ارب ونڑ لاونڑ دا منصوبہ اتے شہراں کوں صاف کرنڑ اساڈاہدف اے۔انہاں آکھیا جو جیڑھے معاشرے اچ جزا اتے سزا دا تصور مک ونجے او معاشرے ترقی نی کر سگدے ایںسانگے جیڑھے ضلعیاں اچ ڈپٹی کمشنرز کم کیتے انہاں سانگے مراعات اتے انعام ہوسن۔انہاں آکھیا جو ٹائیگر فورس اتے انتظامیہ وچال سازگار ماحول بنڑایا ونجے تانجو اورل تے کم کر سگن۔
وزیراعظم عمران خان دا کلین گرین انڈیکس ایوارڈدی تقریب نال خطاب
مضمون کا ماخذ : مڈاس گولڈ
متعلقہ مضامین
